കുതിച്ചുയർന്ന് സ്വർണവില: കേരളത്തിൽ പവന് 1,06,000 രൂപ!

കൊച്ചി: സംസ്ഥാനത്ത് സ്വർണവിലയിൽ റെക്കോർഡ് വർധന. ഇന്ന് ഒറ്റയടിക്ക് ഗ്രാമിന് 210 രൂപയും പവന് 1680 രൂപയുമാണ് വർധിച്ചത്. ഇതോടെ സംസ്ഥാനത്ത് സ്വർണവില പുതിയ ഉയരങ്ങളിലെത്തി.

ഇന്ന് വിപണിയിൽ 22 കാരറ്റ് സ്വർണം ഒരു ഗ്രാമിന് 13,250 രൂപയിലാണ് വ്യാപാരം നടക്കുന്നത്. ഒരു പവൻ സ്വർണം വാങ്ങാൻ ഇപ്പോൾ 1,06,000 രൂപ നൽകണം. അന്താരാഷ്ട്ര വിപണിയിലെ മാറ്റങ്ങളും രൂപയുടെ മൂല്യത്തിലുണ്ടാകുന്ന വ്യതിയാനങ്ങളുമാണ് ആഭ്യന്തര വിപണിയിൽ സ്വർണവില ഇത്രയധികം ഉയരാൻ കാരണമായതെന്നാണ് വിപണി വിദഗ്‌ധർ ചൂണ്ടിക്കാട്ടുന്നത്.

 സ്വർണവിലയിലെ ഈ കുതിച്ചുചാട്ടം സാധാരണക്കാരായ സ്വർണാഭരണ പ്രേമികളെയും നിക്ഷേപകരെയും വലിയ രീതിയിൽ ആശങ്കയിലാക്കുന്നുണ്ട്. വരും ദിവസങ്ങളിലും വിലയിൽ വലിയ മാറ്റങ്ങൾ ഉണ്ടാകുമോ എന്നാണ് വിപണി ഉറ്റുനോക്കുന്നത്.

രാജ്യാന്തര വിപണിയിലെ ചലനങ്ങൾക്ക് അനുസരിച്ചാണ് രാജ്യത്ത് സ്വർണവില നിശ്ചയിക്കപ്പെടുന്നത്. ഡോളർ - രൂപ വിനിമയ നിരക്ക്, ഇറക്കുമതി തീരുവ എന്നിവയും സ്വർണവിലയെ സ്വാധീനിക്കുന്ന ഘടകങ്ങളാണ്. നിലവിൽ ലോകത്തെ ഏറ്റവും വലിയ സ്വർണ ഉപഭോക്താക്കളാണ് ഇന്ത്യ. ഓരോ വർഷവും ടൺ കണക്കിന് സ്വർണം രാജ്യത്ത് ഇറക്കുമതി ചെയ്യപ്പെടുന്നു. അതുകൊണ്ട് ആഗോള വിപണിയിൽ സംഭവിക്കുന്ന ചെറിയ ചലനങ്ങൾ പോലും അടിസ്ഥാനപരമായി ഇന്ത്യയിലെ സ്വർണവിലയിൽ പ്രതിഫലിക്കും.