നാമെല്ലാവരും ഏതെങ്കിലും തരത്തിലുള്ള ഒരു വാഹനത്തിൻ്റെ ഉടമകളാണല്ലോ,എന്നാൽ എത്ര പേർക്ക് അറിയാം ഇൻഷുറൻസ് പരിരക്ഷ യുമായി ബന്ധപ്പെട്ട വിവരങ്ങൾ?, നമുക്ക് ഒന്ന് പരിശോധിക്കാം.റോഡിലൂടെ പോകുമ്ബോള്‍ ഹെല്‍മറ്റും ലൈസൻസും പുക പരിശോധനാ സർട്ടിഫിക്കറ്റും ആർസി ബുക്കും മാത്രമല്ല, ഇൻഷുറൻസ് ഇല്ലാത്തതിന്റെ പേരിലും എംവിഡിക്ക് പിഴ നല്‍കേണ്ടിവരാറുണ്ട്. വാഹനം വാങ്ങുമ്ബോഴും ഓടിക്കുമ്ബോഴും ലൈസൻസ് പോലെ തന്നെ നിർബന്ധമായും വേണ്ട ഒന്നാണ് ഇൻഷുറൻസ്. ഇൻഷുറൻസ് എടുക്കുമ്ബോള്‍ ശ്രദ്ധിക്കേണ്ട കാര്യങ്ങളാണ് ഇവിടെ പറയുന്നത്.
തേർഡ് പാർട്ടി ഇൻഷുറൻസുള്ള ഒരു വാഹനം വാലിഡ് ആയ ഡ്രൈവിങ് ലൈസൻസുള്ള രജിസ്റ്റേർഡ് ഉടമ ഓടിച്ചുപോകുമ്ബോള്‍ അപകടത്തില്‍പ്പെട്ട് മരിച്ചാല്‍ ഇയാളുടെ കുടുംബത്തിന് നഷ്ടപരിഹാര തുക കിട്ടാൻ അർഹതയുണ്ടോ? ഉണ്ട്. അയാളുടെ കുടുംബത്തിന് 15 ലക്ഷം രൂപ വരെ ഇൻഷുറൻസ് ക്ലെയിം കിട്ടാൻ അർഹതയുണ്ട്. ഇനി അയാള്‍ മരിച്ചില്ല, സ്ഥിരവും പൂർണവും അംഗഭംഗം സംഭവിച്ചാലും ഇതേ തുക തന്നെ അനുവദിച്ച്‌ കിട്ടും. യാതൊരു കോടതിനടപടിക്രമങ്ങളും ഇല്ലാതെതന്നെ ഇൻഷുറൻസ് കമ്ബനിയുടെ നേരിട്ടുള്ള സെറ്റില്‍മെന്റിലൂടെ ഈ നഷ്ടപരിഹാര തുക അനുവദിക്കും.
എന്നാല്‍ അതിന് ചില നിബന്ധനകളുണ്ടെന്ന് മോട്ടോർ വാഹന വകുപ്പ് പറയുന്നു. നമ്മള്‍ ഇൻഷുറൻസ് എടുക്കുമ്ബോള്‍ ചില കാര്യങ്ങള്‍ ശ്രദ്ധിക്കണം. രണ്ട് ഭാഗങ്ങളാണ് മോട്ടോർ ഇൻഷുറൻസിനുള്ളത്. അപകടത്തില്‍ വാഹനത്തിന് എന്തെങ്കിലും നാശനഷ്ടങ്ങളായാല്‍ അത് പരിഹരിക്കുന്ന 'ഓണ്‍ ഡാമേജ് പോർഷൻ' ആണ് ഒന്നാമത്തേത്. മറ്റൊരാള്‍ക്കോ അയാളുടെ വസ്തുവകകള്‍ക്കോ നാശനഷ്ടം സംഭവിച്ചാല്‍ അതിന് കവറേജ് കിട്ടുന്ന 'തേർഡ് പാർട്ടി പോർഷൻ' ആണ് രണ്ടാമത്തേത്.
ഇത് രണ്ടും കൂടിച്ചേരുന്ന കോംപ്രിഹെൻസീവ് പോളിസിയായിട്ടോ അല്ലെങ്കില്‍ തേർഡ് പാർട്ടി പോർഷൻ മാത്രമായിട്ടോ ഒരാള്‍ക്ക് ഇൻഷുറൻസ് എടുക്കാനാകും. ഒരു വാഹനം നിരത്തില്‍ ഇറക്കണമെങ്കില്‍ 'ലീഗല്‍ ലൈബിലിറ്റി ടു തേർഡ് പാർട്ടി' എന്ന തേർഡ് പാർട്ടി ഇൻഷുറൻസ് നിർബന്ധമായും ഉണ്ടായിരിക്കണം.
ഇനി ആദ്യം പറഞ്ഞ ഇൻഷുറൻസ് തുകയായ 15 ലക്ഷം രൂപ വാഹന ഉടമയ്ക്കോ അയാളുടെ നോമിനിക്കോ എപ്പോഴാണ് ലഭിക്കുന്നതെന്ന് പറയാം. ഈ വാഹനത്തിന്റെ തേർഡ് പാർട്ടി ഇൻഷുറൻസ് എടുക്കുമ്ബോള്‍ തന്നെ 'കംപല്‍സറി പേഴ്‌സണല്‍ ആക്‌സിഡന്റ് കവർ' (സിപിഎ കവർ) ഈ ഇൻഷുറൻസില്‍ ചേർത്തിട്ടുണ്ടെങ്കിലേ അയാള്‍ ഈ ക്ലെയിം തുകയ്ക്ക് അർഹനാകൂ. അങ്ങനെ വന്നാല്‍ ഈ തുക ഇൻഷുറൻസ് കമ്ബനി ഇയാള്‍ക്കോ നോമിനിക്കോ കൊടുക്കാൻ ബാധ്യസ്ഥരാണ്.
വാഹന ഉടമ വാലിഡ് ആയ ഡ്രൈവിങ് ലൈസൻസുള്ളയാളാണെങ്കില്‍ തേർഡ് പാർട്ടി ഇൻഷുറൻസ് എടുക്കുമ്ബോള്‍ തന്നെ 'സിപിഎ കവർ ഫോർ ഓണർ കം ഡ്രൈവർ' എന്നത് നിർബന്ധമാണ്. ഇതിന് വെറും 325 രൂപ മാത്രമാണ് ഇൻഷുറൻസ് കമ്ബനികള്‍ പ്രീമിയമായി ഈടാക്കുന്നത്. തേർഡ് പാർട്ടി ഇൻഷുറൻസ് എടുക്കുമ്ബോള്‍ ഇദ്ദേഹത്തിന്റെ നോമിനിയെയും കൂടെ ചേർക്കണമെന്ന് മാത്രം.
ഡ്രൈവിങ് ലൈസൻസുള്ളയാള്‍ വാഹനമോടിക്കുമ്ബോള്‍ 'ഓണർ കം ഡ്രൈവർ സിപിഎ കവർ' എടുക്കണമെന്ന് പറയുമ്ബോള്‍ ഓരോ വാഹനത്തിനും ഇയാളിത് എടുക്കണോ എന്നാവും ഉയരുന്ന സംശയം എന്നാല്‍ അതിന്റെ ആവശ്യമില്ല. 'സ്റ്റാൻഡ് എലോണ്‍ പിഎ കവർ' എന്നൊരു പ്രത്യേക പോളിസി എടുക്കുകയും ഇതിലേക്ക് എല്ലാ വാഹനങ്ങളുടെയും തേർഡ് പാർട്ടി ഇൻഷുറൻസും വാഹന നമ്ബരും ചേർക്കുകയും ചെയ്താല്‍ ഈ 'കംപല്‍സറി പിഎ കവർ' അയാള്‍ക്ക് ലഭ്യമാകും.
'സ്റ്റാൻഡ് എലോണ്‍ സിപിഎ' എടുക്കുമ്ബോള്‍ ഇതില്‍ ചേർക്കുന്ന വാഹനങ്ങളുടെയെല്ലാം തേർഡ് പാർട്ടി ഇൻഷുറൻസ് സമയാസമയങ്ങളില്‍ പുതുക്കേണ്ടതുണ്ട്. മാത്രമല്ല, മറ്റൊരു കാര്യം കൂടി ശ്രദ്ധിക്കണം. 'സ്റ്റാൻഡ് എലോണ്‍ സിപിഎ' ഒരു വർഷം കാലാവധിയുള്ള പോളിസിയാണ്. നിലവിലെ ഇൻഷുറൻസ് കമ്ബനിയില്‍ നിന്നുതന്നെ ഈ 'സ്റ്റാൻഡ് എലോണ്‍ സിപിഎ' എടുക്കണമെന്ന് ഒരു നിർബന്ധവുമില്ല. നമുക്ക് ഇഷ്ടമുള്ള ഏത് കമ്ബനിയില്‍നിന്നും ഇതെടുക്കാം.
കംപല്‍സറി പിഎ കവറിന്റെ പ്രയോജനം ലഭിക്കാൻ ശ്രദ്ധിക്കേണ്ട കാര്യങ്ങള്‍ ഇവയാണ്...
1. വാഹന ഉടമയ്ക്ക് വാലിഡായ ഡ്രൈവിങ് ലൈസൻസ് ഉണ്ടാവണം
2. പോളിസിക്ക് കാലാവധിയുണ്ടായിരിക്കണം
3. രജിസ്റ്റേർഡ് ഉടമയ്ക്ക് മാത്രമായിരിക്കും പ്രയോജനം ലഭിക്കുക
4. ഈ ക്ലെയിം ലഭിക്കാൻ ഇൻഷുറൻസ് കമ്ബനി ആവശ്യപ്പെടുന്ന എല്ലാ രേഖകളും ഹാജരാക്കണം
വാഹന ഉടമയ്ക്ക് ഡ്രൈവിങ് ലൈസൻസ് ഉണ്ടെങ്കില്‍ മാത്രം 'കംപല്‍സറി പിഎ കവർ ടു ഓണർ കം ഡ്രൈവർ' എടുത്താല്‍ മതി. അല്ലാത്ത സാഹചര്യത്തില്‍, മറ്റൊരാളെ പെയ്ഡ് ഡ്രൈവറായി നിയമിച്ചാണ് ഈ വാഹനം ഉപയോഗിക്കുന്നതെങ്കില്‍ ഒരു അപകടത്തില്‍പ്പെട്ട് ഈ ഡ്രൈവർക്ക് മരണമോ പരിക്കോ സംഭവിച്ചാല്‍ എങ്ങനെയായിരിക്കും ഇൻഷുറൻസ് പരിരക്ഷ ലഭിക്കുക...? അതിനും വഴിയുണ്ട്.
വാഹന ഉടമ തേർഡ് പാർട്ടി ഇൻഷുറൻസ് എടുക്കുമ്ബോള്‍ തന്നെ പെയ്ഡ് ഡ്രൈവർക്കായി 50 രൂപ അടച്ച്‌ ഇൻഷുറൻസില്‍ ചേർത്താല്‍ കോടതി നടപടിക്രമങ്ങളിലൂടെ (അങ്ങനെ മാത്രം) ഇൻഷുറൻസ് ക്ലെയിം തുക അദ്ദേഹത്തിന് അനുവദിച്ചുകിട്ടും. ഇനി വാഹനം അപകടത്തില്‍പ്പെടുമ്ബോള്‍ അതില്‍ സഞ്ചരിക്കുന്ന മറ്റുള്ളവർക്ക് എന്തെങ്കിലും ഇൻഷുറൻസ് തുക കിട്ടാൻ മാർഗമുണ്ടോ? അതിനും വഴിയുണ്ട്...
നിങ്ങള്‍ തേർഡ് പാർട്ടി ഇൻഷുറൻസ് എടുക്കുമ്ബോള്‍ 'അണ്‍ നെയിംഡ് പാസഞ്ചർ കവർ ഇൻഷുറൻസി'ല്‍ ചേർത്താല്‍ ഈ യാത്രക്കാർക്കും ഇൻഷുറൻസ് കവറേജ് ലഭിക്കുന്നതാണ്. അതിന് പല ഇൻഷുറൻസ് കമ്ബനികളും ഒരാള്‍ക്ക് 35 രൂപ മാത്രമാണ് ഈടാക്കുന്നത്. വാഹനത്തിന്റെ സീറ്റിങ് കപ്പാസിറ്റി എത്രയാണോ അത്രയും പേർക്ക് ഈ തുക അടച്ചുവേണം ഇൻഷുറൻസില്‍ ചേർക്കാൻ. 50,000 മുതല്‍ രണ്ട് ലക്ഷം രൂപ വരെയോ ചിലപ്പോള്‍ അതില്‍ കൂടുതലോ ക്ലെയിം കൊടുക്കുന്ന കമ്ബനികളുണ്ട്. ഇത് ഓരോ കമ്ബനിയെയും ആശ്രയിച്ചിരിക്കും. ഇതും ഡയറക്‌ട് സെറ്റില്‍മെന്റാണ്. യാതൊരു കോടതി നടപടിക്രമങ്ങളും ആവശ്യമില്ലെന്നും എംവിഡി വ്യക്തമാക്കുന്നു.
കംപല്‍സറി പിഎ കവർ ഫോർ ഓണർ കം ഡ്രൈവർ, പിഎ കവർ ഫോർ അണ്‍ നെയിംഡ് പാസഞ്ചർ, പിഎ കവർ ഫോർ പെയ്ഡ് ഡ്രൈവർ ഇവയ്‌ക്കെല്ലാം കൂടി തുച്ഛമായ തുക മാത്രമാണ് തേർഡ് പാർട്ടി ഇൻഷുറൻസ് എടുക്കുമ്ബോള്‍ പ്രീമിയമായി അടയ്‌ക്കേണ്ടിവരുക. ഇതെല്ലാം ഒഴിവാക്കി വളരെ കുറഞ്ഞ തുകയ്ക്കുള്ള ഒരു തേർഡ് പാർട്ടി ഇൻഷുറൻസ് എടുക്കുമ്ബോള്‍ ഈ വാഹനം മൂലം ഇവർക്കാർക്കെങ്കിലും അപകടമുണ്ടായാല്‍ അതിന്റെ എല്ലാ സാമ്ബത്തിക ബാധ്യതയും ഉത്തരവാദിത്തവും രജിസ്റ്റേർഡ് ഓണർക്കായിരിക്കും എന്നോർക്കണം. അപ്പോള്‍ ഓണ്‍ലൈനിലൂടെയാണെങ്കിലും കമ്ബനിയില്‍ നിന്ന് നേരിട്ടാണെങ്കിലും മുകളില്‍പറഞ്ഞ എല്ലാ കവറേജും അതിലുണ്ടോ എന്ന് നോക്കേണ്ട ഉത്തരവാദിത്തം രജിസ്റ്റേർഡ് ഉടമയ്ക്കുണ്ട്
No comments:
Post a Comment