ന്യൂഡല്ഹി: ക്രൂഡ് ഓയില് വില കുതിച്ചുയരുന്ന സാഹചര്യത്തില് ഇന്ത്യയിലും എണ്ണ വില ഉടന് വര്ധിക്കുമെന്ന് റിപ്പോര്ട്ട്. രാജ്യത്തെ എണ്ണക്കമ്പനികള്ക്ക് പ്രതിമാസം ഏകദേശം 30,000 കോടി രൂപയുടെ സാമ്പത്തിക നഷ്ടം നേരിടുന്നതിനാല് മെയ് 15 ന് മുമ്പ് ഇന്ത്യയില് പെട്രോള്, ഡീസല്, ഗ്യാസ് വില വര്ധിപ്പിക്കുമെന്ന് ഇന്ത്യാ ടുഡേ ടിവി റിപ്പോര്ട്ട് ചെയ്തു. വര്ധന കേന്ദ്രസര്ക്കാര് അംഗീകരിച്ചാല്, പെട്രോള്, ഡീസല് വില ലിറ്ററിന് ഏകദേശം 4-5 രൂപ വരെ ഉയരും. ഗാര്ഹിക എല്പിജി സിലിണ്ടറുകളുടെ വിലയില് 40-50 രൂപ വരെ വര്ധനവ് ഉണ്ടായേക്കാം. ഏകദേശം നാല് വര്ഷത്തിനിടെ ആദ്യമായാണ് പെട്രോള്, ഡീസല് വിലയില് വര്ധനവുണ്ടാകുന്നത്. 2022 മുതല് ചില്ലറ വില്പ്പന നിരക്കുകള് വലിയതോതില് മരവിപ്പിച്ചിരിക്കുകയാണ്.
ഇറാനെതിരേ ഇസ്രായേല്-യുഎസ് ആക്രമണം തുടങ്ങിയതോടെ ക്രൂഡ് ഓയില് വില ബാരലിന് 70 യുഎസ് ഡോളറില് നിന്ന് 126 യുഎസ് ഡോളറായി ഉയര്ന്നതിനെത്തുടര്ന്നാണ് പ്രതിസന്ധി രൂക്ഷമായത്. ആഗോള എണ്ണമേഖലയില് കടുത്ത ആഘാതം നേരിട്ടിട്ടും, ഇന്ത്യ ഇതുവരെ ചില്ലറ ഇന്ധന വില വര്ധിപ്പിച്ചിട്ടില്ല.
