മക്ക/ലിബിയ: 2025-ലെ ഹജ്ജ് തീർത്ഥാടനത്തിന് പുറപ്പെട്ട ലിബിയൻ യുവാവ് അമർ അൽ മഹ്ദി മൻസൂർ അൽ ഗദ്ദാഫിയുടെ യാത്ര അത്ഭുതങ്ങൾ നിറഞ്ഞതായിരുന്നു. ഇസ്ലാമിക വിശ്വാസത്തിൽ ഏറെ പ്രാധാന്യമുള്ള ഹജ്ജ് നിർവഹിക്കാൻ ആത്മാർത്ഥമായി തയ്യാറെടുത്ത അമറിന്, യാത്രയുടെ തുടക്കത്തിൽ തന്നെ അപ്രതീക്ഷിത തടസ്സങ്ങളെ നേരിടേണ്ടി വന്നു. എന്നാൽ, അതിനെയെല്ലാം അതിജീവിച്ച് അദ്ദേഹം വിശുദ്ധ കർമ്മം പൂർത്തിയാക്കിയത് സമൂഹമാധ്യമങ്ങളിൽ വൈറലായി മാറി.
ഹജ്ജിന് പുറപ്പെടാനായി വിമാനത്താവളത്തിൽ എത്തിയ അമറിനെ, പേരിൽ 'അൽ ഗദ്ദാഫി' എന്ന് ഉള്ളതിനാൽ സുരക്ഷാ ഉദ്യോഗസ്ഥർ തടഞ്ഞുവച്ചു. സുരക്ഷാ പരിശോധനകളിൽ വന്ന കാലതാമസം കാരണം അദ്ദേഹത്തിന്റെ സംഘത്തിലെ മറ്റ് തീർത്ഥാടകർക്ക് വിമാനത്തിൽ കയറാനായി. എന്നാൽ, വീണ്ടും പേര് തടസമായി, അമറിനെ ഇമിഗ്രേഷൻ കൗണ്ടറിൽ തടഞ്ഞുനിർത്തി. സമയം അതിക്രമിച്ചതിനാലും സുരക്ഷാ ആശങ്കകൾ ചൂണ്ടിക്കാട്ടിയും വിമാനത്തിന്റെ ക്യാപ്റ്റൻ അമറിനെ കയറ്റാൻ വിസമ്മതിച്ചു.
അമറിനെ കയറ്റാതെ വിമാനം കൃത്യസമയത്ത് പറന്നുയർന്നെങ്കിലും, ഏതാനും മിനിറ്റുകൾക്കുള്ളിൽ വിമാനം സാങ്കേതിക തകരാർ കാരണം തിരിച്ചിറക്കേണ്ടി വന്നു. ഇത് യാത്രക്കാരിലും ജീവനക്കാരിലും ആശങ്ക സൃഷ്ടിച്ചു. തകരാർ പരിഹരിച്ച് വിമാനം വീണ്ടും പുറപ്പെടാൻ തയ്യാറെടുത്തപ്പോൾ, അമർ എയർപോർട്ട് അധികൃതരോടും എയർലൈൻ ഉദ്യോഗസ്ഥരോടും വിമാനത്തിൽ കയറാൻ വീണ്ടും അപേക്ഷിച്ചു. എന്നാൽ, പൈലറ്റ് വീണ്ടും പ്രതികൂല നിലപാട് സ്വീകരിച്ചു. അത്ഭുതകരമെന്ന് പറയട്ടെ, തകരാർ പരിഹരിച്ച് വിമാനം രണ്ടാമതും പറന്നുയർന്നെങ്കിലും, ഏതാനും മിനിറ്റുകൾക്കുള്ളിൽ വീണ്ടും സാങ്കേതിക പ്രശ്നങ്ങളെ തുടർന്ന് വിമാനം തിരിച്ചിറക്കേണ്ടി വന്നു! ഈ സംഭവം എല്ലാവരെയും അമ്പരപ്പിച്ചു.
വിശ്വാസത്തിന്റെ വിജയം: പൈലറ്റിന്റെ നിർണായക ഇടപെടൽ
രണ്ടുതവണ വിമാനം തിരിച്ചിറങ്ങിയതോടെ, ക്യാപ്റ്റന്റെ മനസ്സുമാറി. മൂന്നാമത്തെ ശ്രമത്തിൽ വിമാനം പുറപ്പെടുന്നതിന് മുമ്പ്, അദ്ദേഹം വിമാനത്താവള അധികൃതർക്ക് ഒരു അപൂർവ നിർദ്ദേശം നൽകി.'അമർ ഈ വിമാനത്തിൽ കയറാതെ ഞാൻ ഇനി പറക്കില്ല.' ക്യാപ്റ്റൻ ഈ വാക്കുകൾ അമറിന് ഹജ്ജിന്റെ് വാതിൽ തുറന്നുനൽകി. തൻ്റെ ഹജ്ജ് എന്ന സ്വ‌പ്നം അവസാനിച്ചുവെന്ന് കരുതിയ ഹാജിക്ക് മുന്നിൽ വിധി തെളിഞ്ഞു.
അമർ പിന്നീട് യാത്രയ്ക്ക് അനുമതി ലഭിച്ചു, മൂന്നാമത്തെ ശ്രമത്തിൽ വിമാനം വിജയകരമായി പറന്നു. ഈ കഥ അൽ ജസീറ അടക്കമുള്ള അറബ് മാധ്യമങ്ങളിലും സമൂഹമാധ്യമങ്ങളിലും വ്യാപകമായി പ്രചരിച്ചു. ഇതിനെ ദൈവീക ഇടപെടലിന്റെയും വിധിയുടെ നിർണ്ണായകതയുടെയും ഉദാഹരണമായി പലരും കണക്കാക്കി. 'ഞാൻ ഹജ്ജ് പോകാൻ മാത്രമേ ആഗ്രഹിച്ചിരുന്നുള്ളൂ. അത് എന്റെ വിധിയിലുണ്ടെങ്കിൽ, അതിനെ തടയാൻ ആർക്കും കഴിയില്ല, അമർ പിന്നീട് പറഞ്ഞു. അനുഗ്രഹീതനായ ഈ മനുഷ്യനോടൊപ്പം പൈലറ്റുമാരും എയർഹോസ്റ്റസും ഫോട്ടോയെടുത്തതും വൈറലായി.
അമർ അൽ ഗദ്ദാഫിയുടെ ഹജ്ജ് യാത്ര, വിശ്വാസത്തിൻ്റെ ശക്തിയും, വിധിയുടെയും നിർണ്ണായകതയും തെളിയിക്കുന്നതാണ്. തടസ്സങ്ങളെയും പ്രതികൂല സാഹചര്യങ്ങളെയും അതിജീവിച്ച് ലക്ഷ്യത്തിലെത്തിയ അദ്ദേഹത്തിന്റെറെ അനുഭവം, വിശ്വാസം, പ്രതീക്ഷ, ദൃഢനിശ്ചയം എന്നിവയുടെ മഹത്വം ഓർമ്മപ്പെടുത്തുന്നു. ഇത് ലക്ഷോപലക്ഷം വിശ്വാസികൾക്ക് പ്രചോദനമായി മാറുമെന്നതിൽ സംശയമില്ല.
No comments:
Post a Comment