2012 -ല് ഇദ്ദേഹം സർവീസിലിരിക്കെ തന്നെ റെവന്യൂ രേഖകളില് ഇദ്ദേഹം മരിച്ചതായി രേഖപ്പെടുത്തുകയായിരുന്നത്രെ. എന്നാല്, ഇതിനുശേഷവും ഏഴ് വർഷം കൂടി ജോലി ചെയ്ത് 2019 -ലാണ് അദ്ദേഹം സർവീസില് നിന്നും വിരമിച്ചത്. താൻ ജീവിച്ചിരിപ്പുണ്ടെന്ന് തെളിയിക്കാൻ കഴിഞ്ഞ ഒരു പതിറ്റാണ്ടിലേറെയായി ഇദ്ദേഹം വിവിധ ഓഫീസുകള് കയറിയിറങ്ങുകയാണ്. എന്നാല്, കാര്യമുണ്ടായില്ല. റെവന്യൂ ഇൻസ്പെക്ടറായ ലളിത് കുമാർ മിശ്രയ്ക്കെതിരെയാണ് ഇഷാഖ് അലി ഗുരുതരമായ ആരോപണം ഉന്നയിക്കുന്നത്. രേഖകളില് താൻ മരിച്ചതായി രേഖപ്പെടുത്തിയതിന് പിന്നില് വലിയ ഗൂഢാലോചനയുണ്ട് എന്നും ഇഷാഖ് അലി പറയുന്നു.
മരിച്ചതായി രേഖപ്പെടുത്തിയതോടെ അദ്ദേഹത്തിന്റെ കുടുംബസ്വത്ത് ഒരു സ്ത്രീയുടെ പേരിലേക്ക് മാറ്റപ്പെട്ടു. തന്റെ സ്വത്ത് തട്ടിയെടുക്കാൻ ഉദ്യോഗസ്ഥർ വ്യാജരേഖകള് ചമച്ചതാണെന്നും ഇദ്ദേഹം പറയുന്നു. പലതവണ അധികാരികളെ സമീപിച്ചു. എന്നാല്, യാതൊരു ഫലവും ഉണ്ടായില്ല. അങ്ങനെയാണ്, ഇത്തരമൊരു വേറിട്ട പ്രതിഷേധത്തിലേക്ക് അദ്ദേഹം എത്തിയത്. വെള്ളത്തുണി പുതച്ച് മൃതദേഹമായി കിടന്ന ഇഷാഖ് അലി പെട്ടെന്ന് എഴുന്നേറ്റപ്പോള് ചുറ്റുമുള്ളവർ ആദ്യം ഞെട്ടി. പിന്നീട് കാര്യങ്ങള് ബോധ്യപ്പെട്ടതോടെ പ്രതിഷേധം വാർത്തയാകുകയായിരുന്നു. സംഭവത്തില് അന്വേഷണം നടത്തി നടപടിയെടുക്കുമെന്ന് അധികൃതർ അറിയിച്ചിട്ടുണ്ട്.
