തർക്കം വേണ്ടെന്ന്....പാര്‍ക്കിങ് വേറെ, സ്റ്റോപ്പിങ് വേറെ; ഇനി പെറ്റിയടിച്ച്‌ കീശ കാലിയാക്കണ്ട; പാര്‍ക്കിങ്ങിനും സ്റ്റോപ്പിങ്ങിനും പുതിയ നിയമങ്ങളുമായി എംവിഡി

തിരുവനന്തപുരം: എന്താണ് സ്റ്റോപ്പിങ്ങും പാർക്കിങ്ങും.റോഡ് നിയമങ്ങളെക്കുറിച്ച്‌ നല്ല ധാരണയുള്ളവർക്കുപോലും ആശയക്കുഴപ്പമുണ്ടാക്കുന്ന ഒരു കാര്യമാണ് ഇവരണ്ടും.

റോഡപകടങ്ങള്‍ ഒഴിവാക്കാൻ ഈ വിഷയത്തില്‍ വ്യക്തത അത്യാവശ്യമാണ്. ഈ സാഹചര്യത്തിലാണ് എം.വി.ഡി. ഫേസ്ബുക്ക് പോസ്റ്റിലൂടെ ഇവ രണ്ടും തമ്മിലുള്ള വ്യത്യാസം വിശദീകരിച്ച്‌ രംഗത്തെത്തിയത്.

എംവിഡിയുടെ ഫേസ്ബുക്ക് പോസ്റ്റിന്റെ പൂർണ രൂപം:

എന്താണ് സ്റ്റോപ്പിങ് ഉംപാർക്കിംഗ് ഉം?

സ്റ്റോപ്പിങ്ങ്: വളരെ കുറഞ്ഞ നേരത്തേക്ക് സ്വന്തമായോ, അല്ലെങ്കില്‍ ആളുകളെ കയറ്റാനോ ഇറക്കാനോ, സാധനങ്ങള്‍ പെട്ടെന്ന് കയറ്റാനോ ഇറക്കാനോ വാഹനം നിറുത്തുന്നു എന്നാണ് സ്റ്റോപ്പിംഗ് എന്നത് കൊണ്ട് അർത്ഥമാക്കുന്നത്.

താഴെ പറയുന്ന ഇടങ്ങളില്‍ ഒരു വാഹനം നിറുത്തരുത്.

1. റോഡ് ഇടുങ്ങിയതോ കാഴ്ച തടസ്സപ്പെടുത്തുന്നതോ ആയ സ്ഥലത്ത്.

2. ഒരു കൊടുംവളവിലോ അതിനടുത്തോ.

3. ഒരു ആക്സിലറേഷൻ ലയിനിലോ, ഡിസിലറേഷൻ ലയിനിലോ.

4. ഒരു പെഡസ്ട്രൈൻ ക്രോസിങ്ങിലും അതിനു മുൻപുള്ള 5 മീറ്ററിനുള്ളിലും.

5. ഒരു ലെവല്‍ ക്രോസിങ്ങില്‍.

6. ഒരു ട്രാഫിക് സിഗ്നല്‍ ലൈറ്റിനോ Give way അടയാളത്തിനോ Stop അടയാളത്തിനോ മുൻപുള്ള അഞ്ച് മീറ്റർ, അല്ലെങ്കില്‍ നിർത്തിയിട്ടിരിക്കുന്ന വാഹനം ഇത്തരം അടയാളങ്ങള്‍ മറ്റു വാഹനങ്ങള്‍ക്ക് കാണാത്ത തരത്തില്‍ മറയാവുന്നുവെങ്കില്‍.

7. ബസ് ഒഴികെയുള്ളവ ബസ് സ്റ്റാൻ്റുകളില്‍.

8. റോഡില്‍ മഞ്ഞ ബോക്സ് മാർക്കിംഗ് ചെയ്തിരിക്കുന്ന സ്ഥലത്ത്.

9. നിർബന്ധമായും പാലിക്കേണ്ട No Stopping അടയാളം കൊണ്ട് തടഞ്ഞിരിക്കുന്ന സ്ഥലത്ത്.

പാർക്കിംഗ്: വാഹനം പെട്ടെന്ന് ആളുകളേയോ ചരക്കോ കയറ്റുന്നതിനും ഇറക്കുന്നതിനും ഒഴിച്ചുള്ള ആവശ്യങ്ങള്‍ക്കായി നിറുത്തുന്നതും, 3 മിനുട്ടില്‍ കൂടുതല്‍ ഒരു സ്ഥലത്ത് നിറുത്തിയിടുക എന്നതും പാർക്കിങ്ങില്‍ ഉള്‍പെടും.

വാഹനത്തിന് Stopping അനുവദിക്കാത്ത ആദ്യം സൂചിപ്പിച്ച സ്ഥലങ്ങള്‍ കൂടാതെ താഴെ പറയുന്ന സ്ഥലങ്ങളില്‍ കൂടി പാർക്കിംഗ് അനുവദനിയമല്ല.

1. ഒരു മെയിൻ റോഡില്‍

2. നടപ്പാതയില്‍, സൈക്കിള്‍ ട്രാക്കില്‍, പെഡസ്ട്രൈൻ ക്രോസിംഗില്‍

3. ഇൻറർ സെക്ഷൻ, ജംഗ്ഷൻ, കൂടാതെ ഇവയില്‍ നിന്ന് 50 മീറ്ററിനകത്ത്.

4. പാർക്കിംഗ് സ്ഥലത്തിൻ്റെ കവാടത്തില്‍.

5. ബസ് സ്റ്റോപ്പിനടുത്ത്, ആശുപത്രി, സ്കൂള്‍ എന്നിവയുടെ പ്രവേശനം ട്രാഫിക് അടയാളങ്ങള്‍ എന്നിവ തടസ്സപ്പെടുന്ന തരത്തില്‍.

6. ഒരു തുരങ്കത്തില്‍.

7. ബസ് ലൈനില്‍

8. ഒരു വസ്തുവിൻ്റെ പ്രവേശനത്തിലോ പുറത്തേക്കുള്ള വഴിയിലോ

9. തുടർച്ചയായി മഞ്ഞ വര റോഡിനു അരികില്‍ വരച്ച ഇടങ്ങളില്‍

10. പാർക്ക് ചെയ്ത വാഹനത്തിന് എതിരായി.

11. പാർക്ക് ചെയ്ത വാഹനത്തിൻ്റെ സമാന്തരമായി.

12. പാർക്ക് ചെയ്ത വാഹനത്തിന് തടസം സൃഷ്ടിക്കുന്ന തരത്തില്‍.

13. പാർക്കിങ്ങ് നിശ്ചിത സമയത്തേക്ക് അനുവദിച്ച സ്ഥലത്ത് ആ സമയത്തിനു ശേഷം.

14. മറ്റൊരു തരം വാഹനങ്ങള്‍ക്കായി മാറ്റി വച്ച സ്ഥലത്ത്.

15. ഭിന്നശേഷിക്കാർ ഓടിക്കുന്ന വാഹനം പാർക്ക് ചെയ്യാൻ ഒരുക്കിയ സ്ഥലത്ത് അത്തരക്കാർ അല്ലാത്തവർ.

16. No Parking അടയാളം വച്ച്‌ നിരോധിച്ച സ്ഥലങ്ങളില്‍.