അമിത വേഗതയിലെത്തിയ ജീപ്പ് ടിപ്പർ ലോറിയിൽ ഇടിച്ച് കാപ്പ പ്രതി യടക്കം രണ്ടുപേർക്ക് പരുക്ക്.

താമരശേരി:മയക്ക് മരുന്നു ലഹരിയിൽ അമിത വേഗത്തിലെത്തിയ താർ ജീപ്പ് എതിരെ വന്ന ടിപ്പർ ലോറിയിൽ ഇടിച്ച് രണ്ടുപേർക്ക് പരുക്ക്. തച്ചംപൊയിലിന് സമീപം ചാലക്കരയിലാണ് അപകടം.താമരശ്ശേരി അമ്പായത്തോട് മീനംകുളത്തുചാൽ റോഷൻ ജേക്കബ്, വണ്ടിയിൽ ഉണ്ടായിരുന്ന തെങ്ങുകയറ്റ തൊഴിലാളിയായ അനിയാച്ചൻ എന്നിവർക്കാണ് പരുക്കേറ്റത്. ഇരുവരേയും കോഴിക്കോട് മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു. റോഷൻ്റെ നില അതീവ ഗുരുതരമാണ്.

രാവിലെ 11 മണിയോടെയായിരുന്നു അപകടം. താമരശ്ശേരി ഭാഗത്തു നിന്നും ബാലുശ്ശേരി ഭാഗത്തേക്ക് പോകുകയായിരുന്ന ജീപ്പും, എതിർ ദിശയിൽ വന്ന ടിപ്പറും തമ്മിലാണ് കുട്ടിയിടിച്ചത്. ഇന്നു രാവിലെ ഇതേ ജീപ്പ് ഇടിച്ചു ചെക്ക് പോസ്റ്റിന് സമീപത്തെ സ്വകാര്യ വ്യക്തിയുടെ പറമ്പിലേക്കുള്ള ഗേറ്റും, ഡ്രൈവിംഗ് പരിശീലന കേന്ദ്രത്തിൻ്റെ ഗേറ്റും തകർന്നിട്ടുണ്ട്.

നേരത്തെ എംഡിഎംഎ സഹിതം പിടിയിലായതും, അമ്പായത്തോട്ടിൽ വെച്ച് സ്ത്രീയെ പട്ടിയെക്കൊണ്ട് കടിപ്പിച്ച കേസിലും, കണ്ണൂരിൽ പോലീസിനു നേരെ തോക്കു ചൂണ്ടിയ കേസിലുമടക്കം നിരവധി കേസിലെ പ്രതിയാണ് റോഷൻ. കണ്ണൂർ പോലീസ് ഇയാളുടെ മേൽ കാപ്പ ചുമത്തയിട്ടുണ്ട്.